تنقو جزار

عمك تنقو بقي جزار
يضبح يومي ليل ونهار
جاب تربيزة وحضر كتلة
وكم سكين واشتري فرار
قال في نفسو شوية شوية
ما كل الناس بيبدو صغار
وخطوة بخطوة الحال اتصلح
لامن نربا ونبقي كبار
قال لي العازة تخشي الحلة
تعملي دعاية تكون اظهار
هي ياناس ماشفتو التنقو
الليلة خلاص اصبح جزار
يضبح ضان يضبح عجالي
يضبح ألبل ومرات حوبار
كلو معانا انتو تعالو
تعالا وجرب وما تحتار
وعمك تنقو بقي هاميهو
يكفن يبدا قرارو الفيهو
كيفن يضبح باكر بدري
ومن وين حيجيبو خروفا ليهو
والحال متأسف وقاطي قروش
وفوق لي داك في ديون بتجيهو
بقي يتقلب وغلبو النوم
والعازة هناك تشخر تغليهو
اصلاها ماخشت في الصورة
ولاها بتعرف حالو البيهو
وعمك فكر وقرر ينفذ
اصلو العم افكار بتجيهو
وعمك خشي زريبة العازة
وخمش التيس البتربيهو
وضبحو سريع قبال ماتصحي
ولملم جلدو سريع لاميهو
وحتي الراس دا سلخو سريع
معاهو كوارعو هناك داسيهو
وطقطق ليك باع في ثواني
وكل الحلة بتشكر فيهو
وفجأة العازة عرفت بالحاصل
وبعد تفكير وتمحيص تاليهو
قالت برضو ياهو غتايا
وكل البعملو ليا وليهو
اصلو التنقو عليا حنين
وانا رضيانة الروح اديهو
وعمك حس الدينا تكافل
دمعتو نزلت من عينيهو