عمك تنقو في سباق الفروسية

عمكم تنقو فارس تاريخ التاليف 3/يناير/2010
الكاتب ( زاهر الطيب )
==========

عمك تنقو عقلة اتحجر
اصر واجزم يقلد عنتر
باع عربته الماركة هنتر
اشترى مهر سماه الابجر
فاقع لونه ادهم أغر
قال للعازة حصاني هجين
مأصل نسله رزيقاوي ضعين
أكله فاخر ماهـو عجين
تمر وقمح عطرون مخلوطين
****
بعد ما قطع الخيل متين
عمك قال كدا كافين
الكيشة اتقدم بتلحق بعدين
عمل حركة للمشجعين
صهل الابجـر ورفع رجلينه
اتخيل امه قدام عينه
عمك هـوى والله يعينه
كنكش قوي وحكل كرعينه
كتم نفسه ونطط عينيه
****
==============
مشهـد العازة وهي متابة
========= ====

العازة واقفة هناك محروقة
قاعدة تكورك شاحطة عروقا
بلاش تستعرض انت يا عوقا
انهر حصانك اسرع سوقا
خلينا نكسب والجايزة نضوقا
اصله العازة كمان مزنوقة
عايزة ترجع حق صندوقا
*******
مشهـد حركة الحصين
============
عمك تنقو بعد التسخينة
قال في سره الليلة غنينا
عمك جاري وجاري يلاهس
في اقرب لحظة حصل (داحس)
قال للجوكي اظنك داقس
كان تلحقني لكوعك لاحس
عمك اسرع وعزمه اتجدد
عدى و فات الفرسة (عسجد)
كبر وهلل واصبح ينشد
تنقو الفارس وقت الجد
ركاب الريح والبرق المرعد

******

وعمك واصل شعره و الالقاء
وكان قدامة ( لاحق و البلقاء)
في اخر لحظة في المطاف
غبار وعجاج سبب خلاف
كان الفائز ما بنشاف
لكن اللجنة والاشراف
كانت عادلة مع الانصاف
وعمكم فاز مبروووك ألالف**********
النهاية ......

اسماء الحصين مذكورة بين قوسين ...
الأبجر : حصان لعنترة أبن شداد العبسي
داحس : هو حصان مشهور اسطوري لقيس بن زهير العبسي
لاحق :- وهو من مشاهير خيل العرب أيضاً ، وافتخر فرسان العرب بنسله ،
قال فضالة الأسدي :- فلو أنـهم لم يعرفوا بنت ( لاحقٍ )
العسجدي :- لبني أسد ...


(((( خالص تحياتي زاهر الطيب ))))