عمـك تنقـو حكـم مبـارة

فكرة جديده لاكتشاف المواهب : بديكم راس موضوع وكل واحد يكتب محاولة من عنده ونشوف الاجمل
محاولة لاقت تعليق واعجاب الاعضاء ... مع مراعاة المضمون وعدم الخروج عن المألوف
وأهم شء تعرفوا انه تنقو إنسان قـومي ما ليه في السياسـة والعبارات النابئة إذا سمحتم ....

**
يلا نتخيل جميعـأ انـه عمكم تنقـو ( حــــكم مبـارة ، عادل ...، او ضعيف الشخصيـة، او خـائن ،
ولا منظراتي فقط ) اكتب بحواسك انت مع او ضد تنقـو ... بالتوفيق ،،

محـاولات الاعضـاء
==========



Ayman Bin Ahmed

عمكـ تنقو حكم مبـارهـ
سـافر ولفهـ وشايل هـم
قـابل كاكا و رنالدو ومعاو بيكهم
صـفر و دق الكورهـ
وجـات العـازهـ قاطعه الشوطـ
صحتو من أحلى نومه ورافعه الصوت

تخريمة::. الصوت بمعنا صوتها ^_^
ما تفهمونا غلط
دي تقدر تقول مجازفه بسيطة ^_^

==========


Apdu Elkhawad
==========

عمك نتقو في الميدان
حكم الكورة نقد القون
من غير اسباب ولا تأشيره ؟
سأل اللاعب من اداك الباص من غير صفارة ؟
طرد اللاعب من غير انزار
وحسم الكورة من اي حوار ؟
جاط الملعب ...


============

Bakry Algwas
===========

عمك تنقو حكم كوره
دافوري في حلتم الصغيره
حسب فاول وقال مافي حيطه
حسب قوانين شداد الجديده
وحسن أوف سايد من ركنيه
لمن سألوه قال:دي قوانين مستقبليه
وأسأله بلاتيني شخصيه
ولا أقول ليكم: جيبو العازه التتما ليكم
أنا م داير أحكما ليكم
وحاجه ما عندي ليكم


========


Khfwot Alsadig
==========

عمك ةنقو حكم مشهور
قبل الكورة وقف اللعيبة طابور
قال تخشو الميدان بالدور
صفر البداية جاتو كديسة
كورك و نطط وتلب الحيطة
الحق امسك عمك جاتو نفيسة
رجعو ةنقو للميدان
طالب بحرس شخصي كمان
اصلو بخاف الكديسة والفيران
عمك ةنقو برجو الميزان
معروف بكره الكورة من زماااااااااااااااااااااااااااااأاااأن
محاولة شترا ولا رايك آيه زاهر؟!!!!!

==========

Alwaleed Osman Suliman

================


عمك تنقو فكر ونضم
قال يا أخوانا ما أبقى حكم
مشى للعازة أداها الفكرة
قالتلو تمام وتبدا من بكرة
قلدت إيدو تعال نتسالم
انت رياضي وزول تفتيحة
وممكن تحكم في كاس العالم
عمك لبس الزي الرسمي وخت الشارة
وشال معاهو كمان صفارة
عمك دخل الميدان جاري خفيف
وقال يأخوانا اللعب نضيف
صفر تنقو وبدت الكورة
وشوتك شوتك جاطت جوطة
قام (دفنسي) شلت ودفر
وعمك طلع كرتو الأحمر
شوية وعمك أنهى الكورة
والجمهور كورك الحكم ماسورة
عمك اتلفت لقى نفسو اتزرا
قال يأخوانا أحسن أمرق لى برا
مسك الشارع وقال يا حلال حلا
والناس ساكينو لغاية الحلة
عمك دخل البيت باعجوبة
وقال من التحكيم تاني دي توبة
جرت العازة قفلت الباب
قالتلو يا تنقو تاني حدك كورة الشراب


==========

Amin Moawia Alnour

===============


عملتلو العازة جوطة وبليل بقي هضراب
لقي مافي حل غير انو يسويلو إضراب
وبقي ماشي في الشارع يقول اناماكضاب
انا جيد وفيني حكم مية المية وانا جذااب
وقال لي ناس الكورة امشو سيبو الكورة ونجدو كرااب
جات العازة وقالت ليو عمنا نحنا ناس شياب
ماتفضحنا وتقسي علينا الناس ياعذاب
انتا تمشي وتحكم برة احسنليك من كورة نهايتا هلال ومريخاب
امشي شوف واتعلم ياشعب الكورة من الارباب
وتعود لينا تاني برضو بعد داك تنقو الجياب
وتجيب هدايا لي كل الناس والناس تقول عليك راجل ماهو نهاب
حكم الكورة وقال للدنيا انا عم تنقو الماكضاب
شوفو الكورة البرة دي كيف سيبكم من ناس شداد وارباب
(تمامة للاخ الوليد عثمان و100%شغلك ياحبيي)


===========


Babiker Elwali
===========

عمك تنقو حكمنا الدولي شال صفارتو ولبس كدارتو
عمك تنقو زمنو إتاخر سريع سريع بقول للعزة أنا حااتأخر
جيب باقي الحاجات والكرت الأحمر
العزة تلملم وتدي وعمك يكب في جيبو
ربك لطف ووصل الملعب وتيييت ضرب الصفارة
وبدت الكورة وعمك تنقو لسه حالتو مستورة


عمك تنقو حكمنا الفاهم كان قلبو وهمو في الدراهم
تيييت عمك صفر وخلص الشوط الأول ومسك الكورة
اللعيبة مشو الاستراحة وعمك
طلع المقصورة نفسو قايم وعرقو يتصبصب وحالتو تحنن
وقت الراحة خلص واللعيبة دخلت الملعب وعمك بقي يتكبكب
شكلو استحلي قعدة المقصورة وقايل نفسو مشجع ونسي الكورة
اللعيبة والجمهور يكورك ياحكم الكورة ياحكم الكورة
عمك انتبه وقال خلوني اخد راحة إنشاءالله دقايق
والجمهور يكورك ياعمك الكورة يا تنقو يا حكم ياماسورة

=======


Kawther Baga

===========

عمك تنقو اختاروه يحكم كورة
قال تمام يمكن يكون فيها دبورة
شال صفارتو ولمع القورة
مشى الاستاد ووقف يتلفت
صفر و قال نشوف الليلة واحد يغلط
عمك تعب من الجريان وقال ياجماعة انا عطشان
وطوالي مرق من الميدان

========



Malak Mohammed
============

بالجد أنتو مبدعين ربنا يحفظكم بس أنا كدا ح اغير وأمش احك راسي ولا اسرق حاجه واجي أقولا لووول


=========

Aboalhol Almhol

==========

تنقو يا مستر كونلينا حكم خلانا نسينا ماضينا وركزنا في ال جاينا حكمك يخلي الحارس يخش مدارس
والمهاجم يفتش في المعاجم.

========


Malak Mohammed
==========

عمك تنقو حاجه عجيبه هاوي يغني جاز وحقيبه
فكر مره ينمي مواهبو يبقى مشهور وزول ترطيبه
ينسى الفقر وينسى أيامو وأي شغله في يدو يسيبه
كون فرقه من جاي لاغادي فرقه غايتو بس تركيبه
ظبط صوتو نح نح ونح نح الليله الفن جاتو مصيبه
مقطع كامل ياالله يتمو والفي راسو كلها يجيبه
هو في وادي والفرقه في وادي نبق في الشجره قرد وطبيبه
وسته دكاتره ودرب وتمرجي وجداده تكاكي أنفلونزا تصيبه
قنابلو عجيبه بالصولات يمط في الغنيه إنشاءالله فلانه تشوكش حبيبه
المعرسه ديك تطلق والراجل التاني شخصيه رهيبه
أبشره وحماده قبضو الجو وهيثم ولولي في التخشيبه
حسن رايح وعوض نادو صفقو إنتو بنات وشبيبه
غايتو هبوط وجوطه شديده وكل جماعه لاقيه نصيبه
عمك مالو ومال الغلبه كايس الشهره لقاها قريبه


==========


عمك تنقو

=======


اشكرك اخت ملاك على النقل دي كانت من عندي في موقعنا الخاص قبل عامين بنتقض
فيها الغنـاء الهـابط ( القرد والنبق و غيره ) وأشكركم مرة اخرى على تفاعلكم وحقيقة
اكتشفت مواهب جديده تقدر تمسك القروب في غيابي لاي وقت

=======


Nazik Salah
========

عمك تنفو صفرللولد الضرب الكوزة وقال معقولة
عمك جاري فات الحد لمن كبكوانقد
عمك خمش الشبكةوفات العارضة
قال الجمهور دا معارضة
انتهت الكورة وعمك كان في الدرجة الاولي


========


محمد صلاح الدين الكرنكي
==============

عمنا تنقو حكم الرايه ..
ماعندو علم رافع لي ملايه .
. اي هدف يحتسبو تسلل عمك تنقو حكايتو حكايه
.. وناس العازه وناس التايه يشجعو فيهو حتي بتول ست الغنمايه .
. جمهورنا العصبي اتشنج منو .. وأول زول جدعو ب كبايه
.. وعينك م تشوف إلا النور قزاز وعلب وجنس حاجات .
. وناس العازه عملو شتات.. وعمنا تنقو عمل تات تا ا ا ا ا ت.......
(هسه بكون قطع البحر الأحمر في طريقه إلي اوربا تات تات تا ا ا ات)


============


Nani Ash
===========


عمك تنقو نزل الملعب ماسك الكوره
و كرتو الاصفر نازل جاري يمين و شمال
ورا اللعيبه في الميدان فوضي شديده
جماهير هايجه يكوكو يقوله تحكيمك
فاشل تنقو دقش راجياهو الدقه
و فبل الزحمه فكا الجريه

============


Ahmed Haj Yousif
============

عمك تنقو شال صفارتو...
وجو الملعب سواها شطارتو..
. وكان ضيف الشرف عيسى حياتو..
. أول هجمه صفر قوون بس إحتار إحسبو لياتو.
.. قعد إتلفت وقام أهداهو لعيسى حياتو..

===========

حمتو حسين
*************

عمك تنقو جاب صفاره
وقال الدنيا بقت غداره
واخير الكوره وحكم الرايه
وجاب الشنطه ولم هدومو
وقال في الكوره بكبر كومو
واول كوره بدا تحكيمه
كانت فاينل وزات قيمه


=========
بقلم نهال حلمي
***********

عمك تابع كاس اوروبا
عرف ناس كاكا بدل سادومبا
اية المانع امش اسبانيا
واحكم كورة في المانيا
كان واكيد مورينو اداهو
...مكافأة شان انتر هو معاهو
وقعد اتخيل روحو هناك
حاكم بايرن وأنتر داك
صمويل ايتو الجاري شديد
جوران بانديف ياخي حديد
وعمك جاري وراهم حاسي
قاعد اكورك اه يا راسي
أريين روبين باصا كورتو
صاحبك توووووت وطلع ليو كرتو

قاليو خير ياتنقو خبارك
ايه بيدور يازول في بالك
قاليو ياخ انا من ما جيت
فد صفارة انا ما سويت
لا طلعت لي واحد احمر... مشاهدة المزيد
لا خوفت الناس بي اصفر
اعمل ايه جوليو يا ساتري
خلي الكورة تخش شان خاطري
عمك صحصح سرعة وفاق
قال والله صحيح ازواق
شن يجبرني اسك الكورة
جلدة وحبلن بيو معمولة
اخير لي جم العازة اقنب
بيت راكوبتو هواها يهبهب

============


بقـلم Marwa Izzeldyn
============

عمك تنقو حكم الكورة
نزل الملعب ولف ودور وجاط الكورة
ليعيبة تكسر
وعمك يينزر احمر واصفرو يجوط الكورة
وتاني تدور وعمك جنتر وراسو اتفجر
وفجاه يفكر
..............
و يخليها تاني تدور ويفك الجرية ويخلي الكورة


==========
Hithm Gbra
=========

عمك تنقو دخل الميدان وقال عايز الناس كلها حبان -صفرللبدايه وشايل همو من النهايه -
-وكانت المبارة صعبه للغايه احتسب فاااااول ---تمو الباقي شباااااااااب


========

بقلم /Ehab Gailani

عمك تنقو حكم مباراة الإنتر والباير
ونقد هدفي مليتو وادي بلنتي لروبين
جاب منو قوون والالمان شالو الكاس.
فجاه عمك صحي من نومتو
ولقي نفسو بحضر في كرة المريخ والخرطوم تلاته

===========

بقـلم / Waddah Mubarak
=============

عمك تنقو مواهبو كتيره
قال الليله نشوف الكوره
شال صفارتو و لبس الساعه
و لما كروتو و قلم و سماعه
لبس الشورت و الشراب... مشاهدة المزيد
و ربط كدارتو في خشم الباب
ارح يا العازه امرقي بسرعه
حكمنا الدولي في عصر السرعه
الساعه 8 جوووه الميدان
جمهور سعران و استاد مليان
تييييييييييييييييييييييييييت
عمك صفر و بدت الكوره
عمك عاشم يكون اسطوره
وفي اول هجمه حصل الحاصل
اعاقه صحيحه عملت فاول
عمك تنقو بعيد بالحيل
جازف نظرو في عز الليل
تييييييييييييييييييييييييت
عمك صفر صفاره سنيـنه
و قال الليله نظام كولينا
و عمل الحيطه تلات خطوات
جاهو الكابتن فنجط و جاط
عمك حازم ما عجبو المنظر
صرف للاعب كرتاً أحمر
جاهو الكوتش و باقي التيم
اصطافو الفني و لجان تحكيم
و في خمس دقايق جاط الميدان
قزاز يتطاير و كمان بومبان
عمك تنقو ظروفو اختلفت
غلبو الموقف و قام يتلفت
و جدع صفارتو و قال يا ليل
و قام متفكفك قوي بالحيل



*********
أراء المعجبين


يونس زنون
=======

الانسان فى حد زاتو مجموعة من المواهب مابتكون معروفة لديه الا يعرف الطريقة الممكن
يكتشف بيها مواهبو وافضل طريقة لاكتشاف موهبة هو الاحتكاك باصحاب المواهب
والولوج داخل الدئرة الموهبية

==============


مشاركات متنوعـة تحكي عن موضوع واحد حددناه في يوم 23/مايو/2010